Минатиот четврток, без никаква претходна најава, екипа на општината ја закрпи големата дупка на крстосницата во Бутел. Работата траеше 20 минути. Последиците, според жителите, ќе траат со години.
„Сите упатства ни беа поврзани со неа. Кај дупката лево, па по дупката втора зграда. Така објаснувавме и на мајсторите, и на доставувачите, и на гостите за слава“, вели Цветанка (49). „Сега сестра ми од Струмица кружи по Бутел од петок и не може да ме најде.“
Неколку доставувачи на храна потврдија дека бројот на изгубени нарачки во Бутел за една недела е зголемен за 300 отсто. „Апликацијата ми покажува адреса, ама адресата тука никој не ја користи. Сите велат кај дупката. А дупка нема“, вели доставувачот Илија (23).
Жителите собраа потписи и бараат од општината дупката да се врати или барем на нејзиното место да се постави табла „Овде беше дупката“. Од општината одговорија дека разбираат, но дека дупката не може да се врати. Сепак, ветија дека веќе следната зима на истото место по природен пат ќе се појави нова.