Театарот во Велес годинава планираше нова поставка на „Крал Лир“ со буџет од 900.000 денари. По ребалансот останаа 60.000 денари, кои веќе беа потрошени на плакатот, па единственото решение беше декорот од детската претстава „Џуџињата во шумата“.
Сцената сега ја сочинуваат дрвја во боја на бонбони, печурка што зборува и сонце со насмеано лице. „Трагедијата е поголема кога е опкружена со радост. Кралот губи сè, а сонцето и понатаму се смее. Тоа е поентата“, објаснува режисерот Борис (46).
Актерот Аце (61), кој го игра кралот, вели дека печурката е поудобна од стариот трон, но има вграден звучник што повремено, среде монолог, изговара „Здраво, деца!“. Звучникот не можат да го извадат, бидејќи печурката е сè уште под гаранција.
Ќерките на кралот се облечени во костими од цвеќиња, а сцената со бурата се изведува со машината за виножито, бидејќи онаа за дожд е расипана. На премиерата половина од публиката беа возрасни, а половина деца чии родители погрешно купиле билети. Децата на крајот плачеа, а возрасните прашуваа кога ќе излезат џуџињата.
Управата на театарот најави дека, заради рамнотежа, следната сезона детската претстава ќе се игра во декорот од трагедијата, со џуџиња во мрачен замок и печурка што на крајот изговара монолог.