Група ентузијасти од Гази Баба по шест месеци теренска работа ја претставија првата туристичка мапа на дупките во населбата. Мапата содржи 112 дупки, поделени во три категории: „за почетници“, „за искусни возачи“ и „само со водич“.
Секоја дупка е опишана како вино. „Зелена пролет“ кај училиштето е „млада, свежа, со изразита длабочина по дожд“. „Старата госпоѓа“ на аголот кај пазарот е „зрела, широка, со долг финиш што возачите го чувствуваат во амортизерите“. Најпознатата, „Бездната“, има и сопствено паркинг-место.
„Сакаме проблемот да го претвориме во можност“, вели Марјан (44), еден од авторите. „Луѓето одат во Тиквешко да дегустираат вино. Зошто да не дојдат во Гази Баба да дегустираат дупки? Ние имаме повеќе, а и се бесплатни.“
Мапата веќе се дели во групите на населбата, а неколку возачи пријавиле дека со нејзина помош за прв пат стигнале од дома до маркет без да истурат ниту една ќеса. Од општината ја поздравија иницијативата и ветија дека нема да санираат ниту една дупка додека не се отпечати второто издание.